vijaya kuweni Sinhala Movie මහාවංශය නොකියවූ අපේ වංශයේ කතාව විජය කුවේණි

මේ ගෙවෙන්නේ ක්‍රිස්තු පූර්ව පන්සිය හතළිස් තුන් වැනි අවුරුද්දේ එක්තරා දිනෙක මැදියම රැයකි. මේ මොහොත මුලු ජම්බුද්වීපයම උත්සවශ්‍රීයෙන් පිරී ගොස් ඇත. ඒ මෙහි පාලක මහා කාලසේන යක්ෂයාගේ දියණි සරණ පවා ගත්තේ අද බැවිනි. යක්ෂ ගෝත්‍රයේ සනුහරයම දැන් සිටින්නේ එතැනය.
සියල්ලෝ කා බී ජය පැන් පුරද්දී හුදකලා වූ තරුණියකි. යක්ෂ රැහෙන් කොන් කර තැබූ ඇය අවාසනාවන්තියක යැයි සැවොම තීරණය කළේ ඇයට පියයුරු තුනක් තිබීමය. එබැවින් කුවේණියට මරණ, මංගල උත්සව තහනම්ය. ගත කරන සිරකාර ජීවිතය ඇයට වහ කඳුරු මෙන් තිත්තව තිබිණ. ඇගේ තනි නොතනියට සිටිනා සීසපාටිකා නම් සේවිකාව නිතර ඈව සැනසීය.
අලුත් හිරුට ඉඩ දී සෞම්‍ය සඳ ක්ෂිතිජ ඉමෙන් නොපෙනී ගියේය. සූර්ය රන්කෙඳි දහරින් මේ සශ්‍රීක භූමිය එකලු වූයේ ආනන්දජනක අන්දමටය. විජය කුමරු ජම්බුද්වීපයට අඩිය තැබුවේ මේ මොහොතේය.
එය අහඹු සිදුවීමකි. භූමියේ සෞභභාග්‍යමත් ශ්‍රියාව දුටු ඔහුගේ නෙත් පිනා ගියේය. ආපසු හැරී නොගොස් මෙරටෙහිම කඳවුරු බැඳ ගත යුතු යැයි හෙතෙම තීරණයකට එළඹින. ඔහුට ඊළඟට දැනගන්නට වුවමනා වූයේ මෙහි පාලකයන් කවුරුන්ද යන්නය. වෙරළින් නික්මී රට අභ්‍යන්තරයට ගමන් කළ විජයට පළමුවර හමුවන්නේ කුවේණියයි. ඔවුන් දෙපොළගේ පළමු හමුවීම ආත්ම ගණනාවකට එහා ගිය බැඳීමක් සේ දෙදෙනාට දැනිණ. ක්‍රමයෙන් විජය කුවේණි ආදර අන්දරයකට මුල පිරීය.
කුවේණිය තම යක්ෂ ගෝත්‍රිකයන් සමඟ තරහින් පසුවන්නියක් බව විජය දැන ගනියි. ඇයගේ ඒ තත්ත්වය පළිහක් සේ උපයෝගී කර ගනිමින් කුවේණියගේ උදව් ඇතුව ජම්බුද්වීපයෙහි අණසක තමාගේ නමට පැතිර වීමට විජය බලාපොරොත්තු වෙයි.
මෙම කතාවෙහි තව බොහෝ රසවත් තැන් ඇත. සුගත් සමරකෝන්ගේ විජය කුවේණි සිනමාපටය මෙහි ඉතිරිය ළඟදීම ගෙන එන්නට සූදානම්ය.
මහාවංශය නොකියූ අපේ වංශයේ කතාව යනුවෙන් තේමාව සකස් කොට ඇති විජය කුවේණි කතා පුවත අපි සැවොම දන්නා එකක් බව ඔබට සිතෙන්නට පුළුවන. නමුත් ඒ කතාවෙහිම නොහසු වූ තැන් කිහිපයක් මෙම චිත්‍රපටය මඟින් ප්‍රේක්ෂකයන්ට ගෙන ඒමට අධ්‍යක්ෂණය මෙන්ම තිර රචනය සැකසූ සුගත් සමරකෝන් උත්සාහ ගනියි.
ගයාන් රණධීර විජය කුවේණි නිෂ්පාදනය කොට තිබේ.

ප්‍රධාන නළු නිළියන්:
විජය - රොජර් සෙනෙවිරත්න
කුවේණි – දුලානි අනුරාධා
සීසපාටිකා - වසන්ති රංවල

සෙසු ප්‍රධාන චරිත:
ක්ලීටස් මෙන්ඩිස්, බුද්ධදාස විතානාච්චි, අනුර ධර්මසිරිවර්ධන, රුපුන් රණධීර (ළමා), අමන්දි ප්‍රියසංජනා (ළමා), රින්ස්ලි වීරරත්න, සරත් දික්කුඹුර, ඉරෝෂනී ලංකාතිලක, රෝහිත බී. පෙරේරා, ජීවානන්ද රූපසිංහ, සුසිල් පෙරේරා, සමන්ත වීරසේකර, කුමාර රණපුර, ශලනි අමල්කා, රංග බුද්ධ, මාකස් ප්‍රනාන්දු.

ආරාධිත රංගනය:
ආචාර්ය ධනවර්ධන ගුරුගේ, සඳුන් විජේසිරි, තිලක් කුමාර රත්නායක, විල්සන් කරුණාරත්න, ෂාමලී ජයවීර, සුමිත් මුදන්නායක, ගාමිණී ජයලත්, නෝමන් පළිහවඩන, ආරියසේන ගමගේ, වසන්ත කුමාරසිරි, සුසන්ත ප්‍රියදර්ශන, ස්ටැන්ලි ක්‍රිෂ්ණරත්න, සම්පත් හේවාපැලැන්දගේ, මොන්ටිගු සරච්චන්ද්‍ර, සංජය සමරකෝන්, මියුරි සමරසිංහ, ශිරාණි ද කොස්තා, පවිත්‍රා වික්‍රමසිංහ, අතුල වී. සමරවීර, නන්දන වීරකෝන්.
විජය කුවේණී මැයි මාසයේ සිට තිරගතවීම ඇරැඹේ.