Chat With Vinu Siriwardana රූ රැජනට ලස්සන විතරක් මදි

දෙරණ රූප සුන්දරිය විනූ උදානි

ඇසිපිය හෙළන සැනින් මේ අඟනාවෝ සුරඟනන් නොවන බව ඒකාන්තය. නමුදු දෙවරක් හෝ තෙවරක් හැරී නොබලා ඒ වග එකවර තීරණය කළ නොහැකි වන්නේ ඒ තරමටම ඔවුන් රූසපුවෙන් වර්ණවත් වන බැවිනි.
ඒ අතරිනුත් වඩාත්ම සුරූපිනිය වීම සැබෑම භාග්‍යයක්. 2012 ටී. වී. දෙරණ මිස් ශ්‍රී ලංකා ෆෝර් මිස් වර්ල්ඩ් තරගයේ ජයග්‍රහනයන් ලබා ගත් දෙදෙනා අතරින් විනු උදානි සිරිවර්ධන ඒ එක් භාග්‍යවන්තියකි.
විනු ඇත්තටම ලස්සනයිද?
මම හිතනවා මම ලස්සනයි කියලා. අනිත් එක මම ලස්සන නිසානේ මට මේ ජයග්‍රහණය ලැබුණේ. හැබැයි සුමුදුත් ජයග්‍රාහිකාවක්. එදා තරගය පැවැති අවස්ථාවේදීම දෙරණ වීට් මිස් ශ්‍රී ලංකා ෆොර් මිස් වර්ල්ඩ් ලෙස අභිෂේක ලබන්න තරම් මම වාසනාවන්ත වුණා.
රූ රැජිණක් වෙන්න ලස්සන විතරක් තිබුණොත් ඇතිද?
නෑ, නෑ. ලස්සන විතරක් නම් මදි. ලස්සනට අමතරව හොඳ පෞරුෂයක් වගේම උගත්කමත් අනිවාර්යයෙන්ම තියෙන්න ඕන මේ වගේ තරගකාරී තරගයකින් ජයග්‍රහණය ලබන්න.
විනුට කවුද මුලින්ම ලස්සනයි කියලා කිව්වෙ?
මගේ අම්මායි තාත්තායි වගේම අයියයි නංගිත් කිව්වා. ඉස්කෝලේ මගේ යාළුවොත් මට කියලා තියෙනවා මම ගොඩාක් ලස්සන කෙනෙක් කියලා. මගේ පාසල නුගේගොඩ අනුලා විද්‍යාලය. රුව නිසාම මම පාසලේ ළමයි අතර විතරක් නෙවෙයි, ගුරුවරු අතරත් ගොඩාක් ජනප්‍රිය කෙනෙක්. 2007 වසරේ සිට 2010 වසර දක්වා පැවැති අවුරුදු උත්සවවල මම අවුරුදු කුමරිය ලෙස කිරුළු පැළඳුවා. ඊට පසුව 2011 දී ‘අනුලා ක්වීන්’ වුණෙත් මමමයි.
‘පාසල් අවුරුදු කුමරිය’ තරගයෙන් එහාට තිබ්බ පළමු පියවර ද මේ?
මම ගිය පාරත් මේ තරගෙටම ඉදිරිපත් වුණාමට මගේ පාසලේ අවසරය අවශ්‍ය වුණා. නමුත් ඒ අවසරය ලබා ගන්න දීර්ඝ කාලයක් අවශ්‍ය වන නිසා මම තරගෙන් ඉවත් වෙලා ඒ අවස්ථාව වෙන කෙනෙකුට ලබා දුන්නා.
ඇයි විනුට හිතුණේ මේ තරගෙට ඉදිරිපත් වෙන්න?
මට අවශ්‍ය ජාත්‍යන්තරය ජයග්‍රහණය කරලා මගේ රටට කීර්තියක් ගෙන එන්න. ඒ සඳහා මම තෝර ගත්තේ මේ මාර්ගය. මම හිතනවා මගේ ඒ තෝරා ගැනීම නිවැරැදියි කියලා.
විනු රඟපාවිද?
බොහෝ දුරට.
ඇයි අවිනිශ්චිත පිළිතුරක්?
නෑ එහෙම නෑ. මට දැනටමත් දැවැන්ත සිනමාපටයකට ආරාධනා ලැබිලා තියෙන්නේ. ඒක බෞද්ධ කතාවක් ඇතුළත් චිත්‍රපටයක්. කොහොම වුණත් මම රඟපාන්නේ රටට ආදර්ශයක් දිය හැකි චරිතම විතරයි.
චිත්‍ර අඳින්නත් පුළුවන් කියලත් ආරංචියි. ඇත්ත ද ඒක?
ඔව්. මට හොඳට චිත්‍ර අඳින්න පුළුවන්. ඒ වගේම මට හොඳට නටන්නත් පුළුවන්. නර්තන අංශයෙන් සමස්ත ලංකා දක්වා තරගවලටත් මම සහභාගි වෙලා තියෙනවා.
මිස් වර්ල්ඩ් තරගෙට ඉදිරිපත් වෙන්නේ විනු ද?සුමුදු ද?
ඒ ගැන නම් හරියටම දන්නේ නෑ. අපි දෙන්නාගෙන් තේරීමක් කරලා ඒ තරගෙට එක් කෙනෙක්ව ඉදිරිපත් කරයි. නමුත් ඒ කාල වකවානුවෙම තවත් ජාත්‍යන්තර තරග හතරක් විතර පැවැත් වෙනවා. අපි දෙන්නා ලැබෙන අවස්ථාවන් අනුව අපේ රට නියෝජනය කරාවි.
එක කිරුළක් වෙනුවෙන් තරග කරලා අවසානෙදි කිරුළ බෙදා ගන්න වුණාද?
කිරුළ බෙදා ගන්න වුණේ නෑ. ඒ හා සමාන තවත් කිරුළක් තවත් කෙනෙක්ට ලැබුණා. එච්චරයි.